فودافون تقدم "افقعني شكرا" ....عرض خاص جديد في رمضان

السلام عليكم و رحمة الله و بركاته

الدور عليكي يا فودافون

 أنا هنجز معاك و أخش في الموضوع علي طول.......ركز معايا

فودافون دي هي سبب مشكلتي التخينة.......ازاي يا عم؟؟؟

نرجع لورا لحد اليوم التاريخي اللي تم اعتماد قرار دخول الانترنت عندنا البيت فيه....يوم دخول ال ADSL و تم الاتفاق علي فودافون ....كلمتهم و جم في خلال أسبوع و الحمد لله وصلنا للنت و أديني قاعد بكتب أهة...ياريت تكونوا بس مش مضايقين أو فكرينه استظراف

المهم...فودافون عندها حاجة اسمها سياسة الاستخدام العادل..واضح من الاسم انها علشان يبقي فيه عدل من استغلال العملاء للانترنت و محدش يأفور و يأخد فوق حقه

طيب اية هية الشروط؟؟؟

ساعة لما أنا كنت لسة مشترك جديد كان مسموح لكل عميل بسبعة جيجا تحميل و تصفح علي الانترنت كل شهر...طب لو عديت السبعة جيجا؟؟

السرعة تقل الي 256 Kb/Sec ....هتقولي امال انت كان عندك السرعة كام؟؟

كانت 1 ميجا ياريس...طبعا لما النت كان جديد عندي كنت بهري السبعة جيجا بس مكنتش بخلصهم الا نادر و بيبقا ناقص في الشهر يوم يومين يعني بتمشي الحمد لله

طبعا هتقولي طالما هيا قضيت...انت قرفنا بالموضوع ده ليه؟؟

هقولك بقا..احنا دلوقتي رمضان و كل سنة و أنت طيب مسلسلات ايه و برامج ايه و قلش للصبح علي كل القنوات الا ما رحم ربي...الصراحة أنا مش بحب الاعلانات الكتير اللي بتيجي علي القنوات أثناء رمضان و يخنقك أثناء التمثلية و ينسيك ايه اللي حصل قبل الفاصل....عايز تجرب الخنقة...خد الفاصل ده:

الملل = الاعلانات ببساطة

 أكيد حسيت بطعم الملل من الصورة زي اللي الاعلانات بتعملة بالضبط....المهم قررت رمضان ده اني هتابع المسلسلات و البرامج من علي النت....و طبعا اللي أحلي و أحلي ان فودافون من كام شهر كده كانت غيرت في سياسة الاستخدام العادل لما الناس اضيقت منها...ربنا يخليك يا فودافون....و بدل السبعة جيجا أصبحت 40 جيجا في وش العدو...طبعا البلية لعبت بقا...الواحد هيتفرج علي كل حاجة..و مرة واحدة هوبا...صحيت علي كابوس الأربعين جيجا بح و كمان السرعة بقت 256 عقدة\فتلة....بقيت بعد الصفحة مابطير مني بقت بتفتح في عشر دقائق....الأربعين جيجا خلصوا في خلال 22 يوم بس....يوم 22 أغسطس حلت الكارثة الكبري و الطامة السوداء و الطاعون الفتاك...40 جيجا خلصوا في خلال 11 يوم من رمضان بس...صوتي ياولية

فودافون....أنا مكتئب