حتي الطلبة ياموبينيل!!الرحمة علي المواطن المطحون!!!شرح عرض الطلبة من شبكة موبينيل مصر!!

السلام عليكم و رحمة الله و بركاته

موبينيل و عرض الطلبة

الصراحة العقول اللي بتبتكر عروض المحمول في مصر سواء لاتصالات أو فودافون أو موبينيل ببساطة معجونة بمية البزنس و علي رأي محمود عبدالعزيز في فلم الكيف "أنا اللي بطلع القرش من بذر العنب" 


بيعرفوا يجروا رجليك ليهم زي ما هما عايزينة
عجبتني فكرة خط موبينيل بتاع الطلبة و لما تعرفوا عنها أكتر أكيد هتعجبكم 
صاحب الفكرة قالك أنا هروح للعيال الصغيرة و هديهوم خط عليه مزايا عجيبة و الخطوط ديه كمان بتبقا بالأخص لبتوع الثاوية العايمة اللي بقالهم سنتين محبوسين و طالع عينهم قالك الراجل أنا هخليهوم يفتحوا في الكلام

خد بالك من العرض المغري

بس ياسيدي أو يا ستي الخط هيديك 1500 رسالة و 900 دقيقة مجانا كل شهر و الكلام ده لمدة ست شهور.......مش قلتلكم بيشد رجلك و بدأ يحط شروطه بقا
قالك لازم الرسالة أو المكالمة تكون لخط موبينيل و ان في اليوم الواحد مسموحلك ب 30 دقيقة و 50 رسالة مجانية بس و الباقي هتدفع من رصيدك طب بالذمة هو شغال رجال أعمال هيوعد يديها ولا هيقضيها شات بالرسائل.

الخلاصة هي اللي جاية

بعد اذنك ركز معايا في ديه:
"يمكنك الحصول على الخط عن طريق زيارة اى من مراكز بيع موبينيل و اشترى خط الطلبة مع تقديم صورة من شهادة الميلاد و بطاقتك الشخصية او بطاقة احد اقاربك من الدرجة الاولى, هذا العرض متاح لفترة محدودة." 

كدة نقدر نحدد الخط معمول لمين شوفت بقا طريقة التفكير أنه يجر طفل أو طفلة أو حتي مراهق أو مراهقة للقصة و يزغلل عنيهم بالأرقام ديه من الرسائل و الدقائق المجانية علشان هو عارف ان المكسب جاي جاي في السكة تفكير استثماري بحت و لكنه رائع ببساطة

و نيجي بأة للتقيل لازم حضرتك تعمل 3 دقائق مدفوعة كل يوم قبل ما يحطلك الدقائق المجانية اليومية و لازم كمان تبعت رسالتين كل يوم قبل الرسائل ما تضاف .........لبست ياحلو ....لازم تشحن ياجميل

و للعلم الدقيقة المحلي في هذا النظام ب 19 قرش و الرسالة ب 29 قرش يعني يوميا 1 جنية و 15 قرش علشا أستفاد من أبو بلاش

لا و فيه موبايل كمان ب 175 جنية بس رهيب ياجماعة ...ليه؟؟؟؟
أقولك ليه....القول بس حط ايدك علي الماوس علشان هتجر الصفحة كتير من كتر الامكايات الرهيبة يلا بسم الله :

صحتك بالدنيا ياغالي

• كاميرا .............بتصور
• راديو.........اختراع القرن العشرين
• انترنت.......بجد هنشيت
• ديبقا تقيلة ......................................................................بلوتوث

و يقبل كارت ذاكرة.............ميموري يابشري يارجعي

عرفت بأه سبب الصورة اللي أنا حطيتها 

بس كدة و كل سنة و أنت طيب و كلمة جد بقي العروض الخرافية ديه بتدل علي ايه علي حاجة واحدة ان برغم ان العروض مغرية لكن برضه مكسبهم خرافي و ان شاء الله الطحن و النفخ بين الشركات التلاتة يزيد و يزيد و تيجي شركات تانية تكبس علي نفسهم علشان مصلحة المواطن المصري المطحون الغلبان....الله يمسيك بالخير يامصر و كل سنة و أنتم طيبين 

تحية ليك يامرحوم

كان ناقص موبينيل و فودافون و اتصالات و تكمل